Na-veto ni Pangueong Ferdinand Marcos Jr. Ro pilang probisyon nga nakapasueod sa 2023 national budget.
Kaibahan kara ro Special Provision No. 1, “Use of Income,” nga suno sa Pangueo hay kaparte eon it revenue and financing sources it Fiscal Year (FY) 2023 National Expenditure Program nga una eon nga ginsumite sa Kongreso.
Suno sa Pangueo,bukon it otorisado ro National Labor Relations Commission (NLRC) nga gamiton ro income kara sandig sa naga-iral nga laye.
Ro sambilog pang gin-veto hay ro DepEd-Office of the Secretary Special Provision No. 4, “Revolving Fund of DepEd TV,” nga suno sa Pangueo ay bukon man it otorisado ro ahensiya nga makaangkon it revolving fund.
Owa man nakaeusot ro Special Provision No. 4, para sa “Branding Campaign Program,” it Department of Tourism nga nakataeanang limitahan ro functions it executive branch para ipatuman ro RA No. 9593 ukon ro Tourism Act of 2009.
Ginpaathag it punong ehekutibo nga sandig sa nakabaehag sa RA No. 9593, kaparte it mandato it DOT nga magplano, magplastar it programa ag magserbing implementing and regulatory government agency sa promotion it tourism industry.
Ro mga nai-vetong probisyon hay ginhimo antes pa man-mapirmahan ro 2023 national budget ko nagtaliwan nga Biyernes, Disyembre 16, 2022.
