Nag-apela ro Municipal Disaster Risk Reduction Management Council ukon MDRRMC nga haeongan ro kaugalingon sa nabilin pang holiday celebration.
Raya hay kasunod sa nataeopangdan nga pila ka mga insidente ag aksidente ro nag-eontad nga andang narespondehan ko adlaw it Paskwa.
Suno kay MDRRMC Kalibo head Mr. Terrence June Toriano, nagahinyo sanda sa pumueoyo nga likawan ro mga disgrasya pinaagi man sa pagmaneho it andang behikulo nga bukon it hilong.
Kon inde eon sigon masarangan pa nga makauli nga matino hay mas mayad nga magpabilin eon lang sa lugar kon sa siin sanda nakipag-inuman hasta nga mahimasmasan.
Raya suno kana ro sambilog sa mga rason it aksidente sa daeanon kon sa siin imbes nga malipayon ro selebrasyon it importanteng okasyon hay mauli pa sa kasubo ag problema it bilog nga pamilya.
Dapat hay maging responsable ro kada isaea bangud nga kabuhi ro aton nga ginahaeongan ag gusto man naton nga maging malipayon ag matawhay ro tanan sa pagsug-aeaw it bag-ong dag-on.
