KALIBO, Aklan—Nagpanindugan ro Bagong Alyansang Makabayan ukon Bayan-Aklan nga owa dapat naging laye ro SIM Card Registration Act bangud nga makabig raya nga pag-eabag sa privacy it mga tawo ag tawhanong kinamatarung.
Raya ro ginpahayag ni Kim Sin Tugna, provincial coordinator it Bayan-Aklan kasunod it implementasyon it laye ko Disyembre 27.
Suno kay Tugna nga simple eamang kon isipon ro SIM card registration, apang sa sitwasyon makaron kun sa siin ginapatuman ro anti-terror law nga pwedeng magamit sa pagpigos sa kinamatarung it publiko, posibleng ro nasambit nga laye hay pagagamiton man agud nga i-monitor ukon i-surveillance ro mga tawo nga nagakontra sa mga ginapatuman nga bulok nga polisiya it gobyerno.
Nasayuran nga tuyo it nasambit nga laye nga matumod ro cybercriminals nga nagagamit it mobile phones agud nga magpangloko ag maghimo it iba pang iligal nga aktibidad.
Sa idaeum it laye, kinahangean nga iparehistro ro bag-o ag naga-eksister ukon presenteng ginagamit nga SIM card pinaagi sa andang service provider.
Ro SIM cards nga indi mapa-rehistro sa gintaeana nga tiempo hay iga-deactivated.
Obligado ro mga social media providers ag telecommunication companies nga magpaguwa it impormasyon bilang sabat sa mandu it korte agud nga mausoy ro ginatumod nga mobile number nga gingamit sa krimen.
