Ginkasubo ni Aklan first district board member Nemesio Neron nga sa pihak it pagpamaeabag it Aklan provincial government nga inde pwede pahugpaan it international flight ro Godofredo P. Ramos aiport sa Caticlan, Malay hay nadayon gihapon ro Royal Air ko Disyembre 26, 2022 sakay ro kapin sa 200 ka mga pasahero paadto it isla it Boracay maghalin sa Tapei, Taiwan.
Bangud kara, apektado ro ekonomiya it banwa it Kalibo ag maging it gobyerno probinsyal.
Nasayuran suno kana nga mabahoe nga kantidad ro ginagastos it national government sa pagpaayos it Kalibo International Airport ag inde dapat raya mauyang.
Nagapati ro opisyal nga dapat ro mga international flights hay iya gid matugpa sa Kalibo aiport agud nga masiguro ro kaeowasan it mga pasahero kamana man inde mawad-an it pangabuhian ro mga nagasalig it andang pang adlaw-adlaw sa pagtrabaho sa nasambit nga paeoparan.
Mataeopangdan nga hueoyapon eon lang ro bukas nga negosyo sa palibot it paeoparan bangud sa kawad-an it customer tuga it pagkaduea man it ibang flights it airline companies.
