Uman nga nag-uli it kadaeag-an sa probinsya it Aklan ro sangka grade 10 student matapos nga magdaog bilang 1st runner up ukon silver award sa ginhiwat nga International Mathematics and Science Olympiad Competition of Southeast Asia (IMOCSEA) sa Belmont Hotel sa isla it Boracay ko Disyembre 27 hasta 30, 2022.
Suno kay Dashell Sean Villanueva nga eubos ro anang kalipay matapos nga makasikyar it award halin sa masobra 100 nga partisipante nga nagpasakop sa kompetisyon.
Ro IMOCSEA hay ginpasakupan it mga delegado halin sa nagkaeain-eain nga nasyon nga ginakaeakipan it Combodia, Malaysia, Indonesia, Bulgaria, Vietnam ag Pilipinas.
Si Dashell eamang ro naga-isaeahanon nga Aklanon nga nagpasakop sa nasambit nga International mathematics competition.
Aminado ro binatilyo nga naging hangkat kana ro face-to-face nga pagpatigayon it exam bangud nasanay imaw nga ginahiwat raya pinaagi sa online.
Owa sigon imaw it masyadong preparasyon ag sa baylo hay ro baeon eamang nana hay ro anang eksperyensya ag natun-an ko mga nagtaliwan nga kompetisyon
