Tanan hay gina-angkat it Pilipinas bugas, asukar, sibuyas ag iba pang agricultural products.
Ag makaron, pati isda ag karne hay gina-angkat eon man.
Sa paeaabuton, posibleng tanan eon nga pagkaon sa lamesa it mga Pilipino hay puro gina-angkat sa ibang nasyon.
Owa eon it mahambae nga kaugalingon nga produce it nasyon.
Maski asin hay gina-import eon man.
Mabudlay patihan apang raya ro kamatuoran ag nagakatabo sa makaron.
Owa man it ginahimo ro mga natungdan agud nga eubusang wakasan ro pag-angkat.
Ginpahayag ni President Marcos Jr. ko Hunyo nga indi nana mabaton ukon masakit sa anang baeatyagon ro gina-ubra nga pag-angkat it Pilipinas partikular eon ro agri products.
Apang, sa pihak it anang pahayag padayun pa gihapon ro importasyon ag owa it senyales nga matuldukan.
Sa pihak it mga pagbaeabag it fisheries sector ag iba pang grupo nga wakasan eon ro pag-angkat it isda, nagapadayun pa gihapon raya.
Owa man sigon dapat naga-angkat it isda ro Pilipinas bangud bastante ro suplay.
Apang, ginapamilit it Department of Agriculture (DA) nga dapat mag-angkat bangud posibleng makaangkon it kakueangan sa suplay
Raya tanan hay nagaresulta man sa amat-amat nga pagkaduea it paeangitan-an it mga lokal nga magingisda.
Bangud sobra-sobra ro ginaangkat, nagabah ro isda sa mga merkado ag owa eon it nagabakae sa dakop it mga makaeu-euoy nga mangingisda.
