KALIBO, Aklan—Gin-anunsyo it Aklan Electric Cooperative ukon Akelco nga maganaba ro panueuktan it kuryente makaron nga buean it Enero.
Suno kay Atty. Ariel Gepty, acting general manager it Akelco nga ro pagnaba sa panueuktan makaron nga buean hay bangud man sa pagnaba it presyo it coal nga ginagamit sa pag-produce it kuryente.
Haeos 88 sentimos kada kilowatt hour ro mabawas sa electric bill it mga residential consumers samtang sa commercial customer hay may pagnaba nga 87 sentimos.
Raya hay katumbas it 88 pesos nga bill para sa mga residential customer nga nagakonsumo it 100 kilowatt per hour.
Ginpahayag dugang nga may posibilidad nga masundan pa ro bawas sa sukot sa kuryente sa Pebrero, apang nagahueat pa sanda it billing halin sa mga generators it kuryente.
Magiging mabahoe nga bulig sigon sa mga residente ro pagnaba it sukot sa kuryente sa atubang it padayun nga nagataas nga presyo it mga nagapangunang baeak-eon sa nasyon.
Sa pihak nga parte, ginkumpirma ni Atty. Gepty nga haeos tanan nga mga electric cooperatives sa Western Visayas hay nagpanaba it sukot sa kuryente bangud sa pagnaba it generate charge.
Kon igakumpara suno kana sa pribadong distribution utilities nga naga-operate sa Iloilo hay mas mataas ro andang sukot it 10 sentimos per kilowatt hour kumpara sa Akelco.
Samtang, agud nga malikawan ro mga power interruptions, ginpahayag ni Atty. Gepty nga mas pang ginpabaskog it andang technical services department ro mga ginapatigayon nga maintenance works.
