Padayon nga ginareklamo ni Punong Barangay Rafael Briones it Briones, Kalibo ro septic tank sa pabaeay it National Housing Authority ukon NHA sa anda nga lugar.
Raya hay matapos nga sa kanae nagaadto ro higko maghalin sa tanan nga unit it pabaeay.
Resulta sigon kara hay nagaalingasaw ro maeain nga hugom ag ro higko hay madoehog man sa suba paadto sa mga kaeapit nga barangay ag sa kasubaan it banwa it New Washington.
Nagpaabot eon sigon imaw it reklamo sa Department of Environment and Natural Resources ukon DENR ag sa iba pang natungdan nga ahensya.
Apang, hasta sa makaron hay raya gihapon ro andang problema.
Apela nana nga maayos ro nasambit nga septic tank ag mabutang sa eksakto ro mga ginaguw-an it higko maghalin sa mga units it nasambit nga pabaeay.
