Sangka babaye sa Sudbury, Canada ro gindaea sa ospital matapos nga mag-eubong sa anang itsura ro yabe nga gin-eapog it anang amigo.
Nagguwa it anang apartment ro 24-anyos nga si Renee Lariviere agud nga magbakae it pagkaon kat masayuran nga naaywan nana sa sueod it baeay ro yabe it anang saeakyan.
Ginsugo nana ro anang amigo nga magguwa ag ginpahaboy ro anang yabe.
Owa ginaeauman ni Renee nga ro anang sugo ro magiging rason it aksidente nga magadaea kana sa ospital.
Pagkahaboy kana it yabe, nag-umpok raya sa anang alima ag tumama ro metal nga parte kara sa anang uyahon.
Suno kay Renee, nakabatyag imaw it puwersa sa itsura apang owa nana nasayuran nga grabe eon gali ro anang tama.
Nangawa pa imaw kon ham-an nga nagpa-panic ro amigo apang nataranta man imaw kat makita sa saeaming kun ano kadaeum ro pag-eubong it yabe sa anang pisngi.
Pag-abot ni Renee sa ospital, insigida imaw nga ginpaidaeum sa CT scan.
Nakita sa scan nga sangka pulgada ag tunga ro kadaeum it pagka-eubong it yabe sa anang nasal cavity.
Bulig it sangka plastic surgeon, ginbo-oe kara ro yabe ag gintahi ro anang nina.
Ginsaysay ni Renee, sa sobrang tumaeagsahon nga aksidente, pilang doktor halin sa nagkaeain-eain nga department it ospital ro nagbisita kana bangud nga indi makapati ro mga raya sa natabu kana.
May sangka emergency room doctor nga nagpangayo it pahanugot kana nga boe-an imaw it litrato agud nga ipakita sa anang mga estudyante.
Sa makaron, fully recovered eon si Renee ag himalang owa imaw nakaangkon it maskin anong peklat halin sa anang aksidente.
