Gin-aprubahan eon it Kamara de Representa sa idaeom it pagdumaea ni Speaker Ferdinand Martin Romualdez, sa ikaywang pagbasa ro House Bill 6717 sa pamaagi it viva voce voting, nga nagtuyong suspindihon ro paggamit it mother tongue bilang medium it pagturo sa Kindergarten hasta Grade-3.
Sa nasambit nga hagna pagamanduan kara ro Department of Education sa pakikipag-angot sa Komisyon sa Wikang Filipino, nga magpa -imprenta it mga libro ag iba pang gamit ag materyales sa pagturo nga ginbaylohan it mother tongue.
Tuyo kara nga sabton ro kakueangan it mga materyales sa pagturo sa mother tongue sa mga eskwelahan ag siguraduhon ro pagpatuman sa konstitusyunal nga mandato, nga makatao it kalidad nga edukasyon nga ma-access it mga estudyante sa basic education.
Suno kay House Committee on Basic Education Chairman ag Pasig Representative Roman Romulo nga ro nasyon hay may 180 dialects, 19 major dialects ag owa it kumpletong set of learning material ukon libro nga magamit para sa 19 nga major dialects.
Ginklaro man kara nga pagasuspindihon eamang it hagna ro pagpatuman it laye ag pagapabay-an ro mga eskwelahan nga maggamit it andang kaugalingon nga dialekto nga magapadayon kung raya hay matumod nga epektibo.
