KALIBO, Aklan—Kapin sa 58 nga mga benepisyaryo it pabahay it National Housing Authority ukon NHA sa barangay Briones, Kalibo ro nagapameligro nga makakas sa listahan matapos nga ma-disqualify.
Ro mabakanteng mga units hay iga-raffle ag iga-award sa iba pang mga nakalinyada nga mga beneficiaries nga una sa waiting lists.
Naging basehan it lokal nga gobyerno it Kalibo sa pagkakas sa andang pangaean hay ro pag-eabag sa ginapatuman nga rules and regulations nga gintaeana it NHA.
Angot kara, nagpadaea it sueat ro local inter-agenyc committee sa pagpanguna ni Kalibo mayor Juris Sucro kay punong barangay Rafael Briones it nasambit nga lugar nga nagapahisayod nga ro 58 nga mga benediciaries hay na-disqualify tuga it andang nahimo nga bayolasyon partikular ro owa pag-istar sa pabaeay ag ro pagpa-renta kara sa ibang tawo.
Sa makaron hay ginaproseso eon ro pagpadaea it notice of violation sa natungdan nga pamilya.
Raya hay pirmado ni Engr. Marlo Villanueva it municipal planning and development coordinator ag mayor Sucro.
