Mag-eowas sa problema sa mga pasilidad, sambilog gihapon sa nagapangunang isyu sa edukasyon hay ro kakueangan sa mga manugturo sa pampubliko ag pribadong eskwelahan.
Angot kara, padayun ro panawagan sa Department of Education (DepEd) nga mag-hire it 30,000 nga bag-ong manugturo kada dag-on sa masunod nga limang dag-on.
Pinaagi kara , posibleng mabawasan ro class size sa 35 nga estudyante kada sangka manugturo nga maga-resulta sa pagpamayad it kalidad it edukasyon sa nasyon.
Base man sa datos it Department of Budget and Management (DBM), kapin sa P14 bilyon pesos ro kinahangeanon agud nga makabo-oe it 30,000 nga bagong teacher sa sang dag-on.
Medyu mabahoe nga pondo apang kun pwede man ag para sa kamaeayran it sistema it edukasyon, ham-an abi nga indi?
Owa it ibang tiempo agud nga ayuson ro kahimtangan it edukasyon sa nasyon kundi nga makaron.
Naaywan eon kita it mga kaiping nga nasyon ag kinahangean nga maka-eagas.
Dapat eon nga usisaon kon siin ro problema.
Ham-an nga may mga nabudlayan nga makapasar sa licensure exam for teachers?
Ag ham-an nga may mga pasado apang owa it trabaho?
Kun gusto naton nga mapamayad ro mga estudyante para sa andang puturo ag nasyon, umpisahan naton ro pagpabaskog sa atong mga manugturo.
Kinahangean naton sanda nga alagaan agud nga maging mas mabaskog, epektibo ag mayad.
Sanda ro giya it mga estudyante, dapat eamang nga sanda hay sa eskwelahan.
Resolbahon eon naton ro problema sa kakueangan it mga manugturo, makaron eon.
