Sangka eaeaki sa Thailand ro gindemanda ro anang ex-wife matapos isekreto kana ro anang pagdaog it jackpot prize sa lotto!
Naga-trabaho ro 47-anyos nga si Narin sa South Korea kat makabaton imaw it tawag halin sa 43-anyos nana nga misis nga si Chaweewan nga ginatapos eon nana ro andang relasyon.
Nag-iba sanda sa sueod it 20 anyos ag may tatlo sanda nga unga nga mga babae rason nga indi mabaton ni Narin nga sa telepono eamang makikipagbueag ro misis.
Bangud kara, insigida imaw nga nag uli sa Thailand agud nga komprontahon si Chaweewan apang nakibot imaw kat masayuran nga nagpakasae eon raya sa ibang eaeaki.
Nasayuran ni Narin halin sa andang mga unga nga nagdaog sa lotto it 12 million baht ukon (katumbas it P19 million) si Chaweewan, sang buean antes raya nga makipagbueag kana.
Apang sa owa it swerte, owa it marriage certificate sanday Narin ag Chaweewan bangud nga bukon it lehitimo ro andang kasae.
Apang suno sa abogado ni Narin nga si Narong Kaewphet, may kinamatarung gihapon ro anang kliyente sa katunga it jackpot prize bangud nga maabung makapamatuod nga nag-iba sanda bilang mag-asawa.
Bilang baeos, nagpasaka it demanda si Chaweewan it reklamong defamation.
Bangud kara, nagpinuril si Narin nga ro anang mister ro nakipagbueag kana ag ginbaliktad kara ro istorya matapos masayuran nga nagdaog imaw sa lotto.
Bangud nag-viral ro nasambit nga istorya sa Thailand, nag-imbestiga man ro mga awtoridad sa matuod nga natabu ag presenteng ginapamatian ro kaso it dating mag-asawa.
