Sangka surfer sa Australia nga nagabuhay it 40 oras sa pag-surfing ro nakabaton it Guinness World Record title!Napaeuha ro 40 anyos nga former surfing professional nga si Blake Johnston kat itau kana it Guinness ro titulong “Longest Surfing Session”.
Ginpatigayon ni Johnston ro record breaking attempt sa Cronulla beach sa Sydney, Australia.
Ginbaton nana ro nasambit nga hangkat para maka-usoy it pondo para makabulig sa mga mental health facilities sa Australia.
Advocate it mental health si Johnston matapos maduea-an it ama bangud sa suicide.
Gin umpisahan ni Johnston it ala 1:00 a.m. it March 16 ro anang pag-surf gamit ro spotlight para makita nana ro hueag it humbak.
Kilaea ro Cronulla beach nga maabung pating ag makamandag nga jellyfish apang owa raya ginsapak ni Johnston ag mas ginpamayad pa nana ro pagsakay sa mga mabahoe nga humbak.
Sa mga rules nga ginplastar it Guinness, pwedeng bumalik sa bibi it baybay si Johnston agud nga magpahuway it 10 minutes sa kada daywang oras.
Natapos ni Johnston ro anang longest surfing session it 5:00 p.m. it Marso 17.
Suno sa Guinness, nakalista si Johnston it bag-ong world record nga 40 hours and 7 minutes ag nakapag-surfing imaw it masobra sa 707 nga humbak.
Mag-eowas kara, nakatipon it masobra sa 215,530 Australian dollars si Johnston halin sa fundraising nga gindungan sa anang surfing session.
Iga-donate ni Johnston ro kwarta sa Chumpy Pullin Foundation, sangka organisasyon nga nagabulig sa mga pamatan-on nga may mental health issues.
