KALIO, Aklan—Kaparte ro Bureau of Fire Protection ukon BFP Kalibo sa Oplan Semana Santa Lakbay Alalay 2023.
Suno kay FO3 Cristina Sendon it BFP-Kalibo nga ginpaidaeum it Department of the Interior and Local Government ukon DILG sa red alert status ro Philippine National Police, BFP, ag Local Government Units sa bilog nga nasyon sa Semana Santa, umpisa ko Abril 2 hasta 8 agud nga masiguro ro seguridad ag kaayusan sa pagdumdum it kuwaresma.
Angot kara, ginmanduan ro tanan nga mga personnel it ahensiya nga magbuylog sa iba pang natungdan nga ahensiya it gobyerno agud nga mag-assist sa mga deboto nga naga agto sa mga simbahan ag iba pang pilgrimage site kamana man sa mga motorista nga magabiyahe paagto sa andang mga destinasyon.
Naka activate suno kana ro andang special rescue force ag quick response team nga magaresponde sa tiempo it emerhensiya.
Kaeabanan sa andang ginataw-an it first aid nga nagadangop kanda hay ro pagbuyog it ueo tuga it sobrang init it tiempo.
Handum it ahensiya nga masiguro ro seguridad it publiko.
Sa Biyernes Santo, maga deploy sanda it fire truck ag ambulansiya sa Bukid Tigayon bangud sa ginaeauman nga pagdagsa it mga tawo ag sa domingo it pagkabanhaw hay idtu sanda sa mga baybayon it Mabilo ag Pook.
Sa pihak nga parte, ginpadumdum man kara sa publiko nga siguraduhon nga owa it nakasaksak nga mga appliance antes nga maghalin sa baeay agud nga makalikaw sa sunog.
