Magapatigayon it pueong makaron nga adlaw ro grupo it mga magbababoy sa bilog nga probinsya it Aklan.
Raya hay agud nga makabaeay it tikang nga pwede nandang mahimo bangud nga sambilog sanda sa mga posibleng maapektuhan it husto matapos nga nakalista eon it kauna-unahang kaso it African Swine Fever sa Brgy. Arcanghel Sur, Balete.
Suno kay Engr. Jun Agravante, Presidente it Federation of Livestock, Hogs and Poultry Raisers sa probinsiya it Aklan nga total nakasueod eon ro ginakahadlukan ag ginakabaeak-an nga virus hay kinahang-ean eon ro maid-id nga pagdahan ag mga preventive measures agud nga inde eon magkalhit sa ibang barangay ag banwa ro ASF.
Angot kara, ginarekomenda sigon it andang grupo nga makaangkon it quarantine border control checkpoint ro tanan nga banwa sa probinsya ag magpatigayon it physical nga pagsikyar sa mga saeakyan kamana man usisaon it husto ro andang mga permit ro transport.
Mag-eowas kara, panugyan man tanan sa tanan nga mga nagaalaga it baboy nga inde gid anay pagtaw-an it damog ukon mga tinuean-on ro andang sapat bilang pagdahan eon man agud nga inde magmasakit ro mga raya.
