Pagporsigi sa training ro sambilog sa makabig nga yabe para maboue ro bueawan nga medalya sa patag it wrestling.
Raya ro ginpayahag ni Jeffrey Aurelio sangka Grade 9 student maghalin sa banwa it Makato.
Magkahalo sigon nga emosyon ro nabatyagan ni Aurelio matapos nga maboue ro bueawan nga medalya ag opisyal nga makasueod sa palarong pambansa.
Masadya sigon imaw sa nasambit nga kadaeg-an apang sa pihak nga parte hay masubo bangud sa owa nakasueod sa palarong pambansa ro iba nanang kaibahan.
Grabe sigon nga pagporsigi ro anang ginpatigayon sa mga ginpaidaeoman nga trainings para makuhit ro nasambit nga kadaeag-an.
Apang ginklaro kara nga magkaiba sa napapamantaw sa mga TV kumpara sa wrestling nga ginapatigayon sa mga sporting events ro anang ginpasakopan.
Sa pihak nga parte, haead ni Aurelio sa bilog nana nga pamilya ro anang kadaeg-an ag sa tanan nga tawo nga una gid pirme sa anang likod para nga magtao it suporta .
Angot kara, haom eon si Aurelio nga magsabak para sa palarong pambansa ag pagahimuon rong tanan para uman nga maiuli ro bueawan nga medalya para sa probinsya it Aklan.
