Haom eon ro mga atletang pinoy sa hampang nga pencak silat nga bumyahe paadto it nasyong Cambodia para sa Southeast Asian Games ukon SEA Games 2023.
Suno sa Aklanon gold medalist nga si Mary Francine Padios, nakaskedyul ro andang byahe hin-aga nga adlaw it miyerkules, Mayo 3 bandang alas-4:00 it aga-aga.
Angot kara, uwa gihapon sanda nagarelax sa puspusan nga training bangud nga kinahang-ean nanda raya para pahauman it husto ro pagsabak sa hampang kontra sa mga atleta it iba pang nasyon.
Ginpahayag dugang ni Padios nga uwa gihapon sanda nagata-o it kumpyansa bangud nga nakasalalay kanda ro bandera it Pilipinas nga makauli it medalya para sa nasyon.
Nag-apela man imaw sa pumueoyong Pilipino it pangamuyo para makapagperform it husto ag matapos ro andang hampang it maayos.
Si Padios hay silver medalist ko 2019 SEA Games nga ginhiwat iya sa nasyon samtang ko 2022 SEA Games sa nasyon it Vietnam hay nakuhit eon nana ro bueawan nga medalya.
Ro mga pencak silat players hay presenteng naka-isolation training sa Lipa, Batangas.
