Igapatuman eon ro bag-o nga paeanuktan sa pagpakatay it baboy sa Kalibo slaughter house umpisa hindunang gabie, adlaw it Biyernes.
Raya hay kasunod sa pormal nga pag-umpisa it operasyon it bag-ong slaughter house nga nakadesinyo nga maging double A standard.
Ginpahayag ni Agricultural Officer Uriel Las Piñas nga raya hay sa idaeom it nauna eon nga ginpatigayon nga public hearing ag nakaangkon it joint venture agreement sa tunga it nagproponer ag LGU-Kalibo.
Suno kana nga ginproponer it Philippine Slaughter House Management Operatons, Inc ukon PSMO nga pagataasan ro paeanuktan sa pagkatay it kada indi magtaas sa 120kg nga baboy sa kapin P150 pesos.
Nasayuran nga mabuhay eon ro nasambit nga kasugtanan apang bangud sa pagpaeanasa it pandemya hay owa eagi raya hapatuman.
Ginpahayag dugang nga sa slaughter house eon mismo magabayad it P150 pesos.
Apang, nagapabilin nga sa munisipyo magabayad it post mortem ag anti-mortem inspection fee.
Ginpasiguro man ni Las Piñas nga apisar nga nagtaas ro slaughter fee hay kabaylo man kara ro standard nga klase it mga karne nga ginakatay ag ginabaligya sa merkado.
Mag-eowas kara, puwedi eon nga maigabaligya ro mga karne it baboy sa establisyemento nga nagakinahangean it meat products ag kamana man ro pagtugyan nga maigabaligya ro mga karne sa guwa it banwa it Kalibo.
