KALIBO, Aklan—Ginpaboran ni Atty. Harry Sucgang, sangka batikan nga abogado sa Aklan ro naging pahayag ni Department of National Defense Secretary Gilbert Teodoro nga inde eon kinahang-ean ro peace talks sa mga miyembro it New Peoples Army.
Suno kana, kasunod sa pagkamatay it andang lider nga si Joma Sison hay uwa man it napabalitang nagtake-over sa anang pwesto rason nga sa baylo nga himuon ro peace talks hay gin-engganyuhon eon lang ro mga raya nga magbalik sa sabak it gobyerno.
Mag-eowas kara, magpasakop sanda sa pulitika agud nga kon magdaog hay mabatian ro andang boses sa kongreso ag sa senado.
Ginpahayag dugang ni Sucgang nga uwa man gid naging epektibo ro peace talks rason nga tama eamang ro naging desisyon ni Teodoro ag manami raya nga paunang tikang sa anang pagpamuno sa nasambit nga ahensya.
Samtang sa pihak nga parte, nagta-o it reaksyon si Atty. Sucgang sa engkwentro sigon nga natabo sa tunga it tropa it militar ag mga rebeldeng grupo sa banwa it Libacao.
Suno kana, kon amat hay bukon raya it genuine bangud nga kon seryoso ag pursigido ro mga kasoldaduhan hay madali nga mapulbos ro mga rebelde.
Mas sangkiri ro andang numero kon ikumpara sa tropa it militar ag kon palibutan ro kabukiran hay madali ro mga raya nga masikop.
