KALIBO, Aklan—Suportado it grupo it landowners nga mas kilaea sa tawag nga Nalook, Pook, Caano Association ukon Napocacia ro ginatanyag makaron it lokal nga gobyerno it Kalibo ag Department of Transportation ukon DOTr nga mataw-an sanda it relocation site sa Brgy. Tigayon, Kalibo.
Suno kay Herman Baltazar, presidente it NAPOCACIA nga nagpatigayon eon it geo-tagging ukon survey agud nga matumod kon sin-o ro mga apektadong residente nga maisaylo sa relocation site.
Nauna eon nga nagademand ro grupo it mga landowners nga mataw-an it mataas nga kabayaran para sa parsela it eugta nga pagagamiton it gobyerno para sa bilyong proyekto nga maga-develop sa Kalibo International Airport, ro gateway sa sikat nga isla it Boracay.
Suno kana nga nakadepende eon sa korte ro pagdesisyon angot kara.
Ginklaru dugang ni Baltazar nga owa sanda nagakontra sa proyekto, basta nga mataw-an sanda it ilistaran ag pangabuhian.
Ginaboebanta nga 971 nga landowners ag residente ro posibleng maapektuhan it proyekto.
Paga-agyan it proyekto nga magapahaba ag magapaeapad sa runway it airport ro 6 nga barangay nga ginaeakipan it Pook, Nalook, Caano, Estancia, Tigayon kamana man sa Brgy. Puis sa banwa it New Washington.
Engkaso nga maaprubahan it national government ro proposal dayun nga magapatawag it pueong ro DOTR sa mga apektadong residente.
