KALIBO, Aklan–Ginpaburan it provincial board sa ginpatigayon nga regular session ro kagustuhan ni Aklan 2nd district board member Jay Tejada nga magpatigayon it legislative inquiry angot sa ginapangatubang nga problema it 44 nga ati tribal families sa isla it Boracay.
Raya hay may kaangtanan sa posibleng pagkansela it andang Certificate of Land Ownership Award ukon CLOA nga gintau it dating administrasyong Duterte ko dag-on 2018.
Kasunod raya it ginpasaka nga petisyon it pilang mga claimants partikular ro mga property developers nga ro nasambit nga eugta nga kapin sa 4,800 square meters nga gintau sa mga ati tribal families bilang land reform beneficiaries sa Brgy. Manocmanoc hay owa nagakabagay para sa agricultural purposes nga ginpaboran man it Department of Agrarian Reform ukon DAR region 6.
Bangud kara, nagdihon ro grupo it mga ati pinaagi sa andang abogado it motion for reconsideration, apang owa pa it sabat hasta sa makaron.
Matapos nga ginpaabot it Bombo Radyo ro nasambit nga problema kay board member Tejada, ginpasiguro it opisyal nga pagabuksan ro isyu pinaagi sa sangka legislative inquiry nga ginpasugtan man it mga kaparehong board members.
Ginpaathag ni Tejada nga tuyo it nasambit nga tikang nga masayuran kon balido ro ginpatigayon nga pagtuon nga ro eugta nga gintau sa mga tumandok nga ati hay owa nagakabagay nga tam-an it mga produktong agricultural.
Pagapatawgon man sigon nanda ro DAR Region 6, Department of Agriculture, mga lider it katutubong ati ag iba pang natungdan nga ahensiya it gobyerno agud nga maklaruhan ro nasambit nga problema.
Ro isyu hay gin-refer sa committee on indigenous peoples, committee on agriculture, committee on laws ag committee on tourism.
