KALIBO, Aklan—Agud nga masiguro nga haum ro mga pampublikong eskwelahan sa pagbukas it klase, gin anunsyo it Department of Education ukon DepEd Region 6 ro pagpatigayon it 2023 “Brigada Eskwela” umpisa sa Agosto 14 hasta 19 nga may tema nga “Bayanihan Para sa Matatag na Paaralan”.
Suno kay DepEd region 6 spokesperson Hernani Escullar Jr., nga ro tikang hay sandig sa ginpirmahan ni Vice President ag Education Secretary Sara Duterte nga DepEd Order No. 21 series of 2023 nga may petsang Agosto 3.
Ro Brigada Eskwela suno kana hay sangka nationwide school maintenance program kun sa siin eakot ro tanan nga education stakeholders agud nga mag-contribute it andang oras, skills, resources ag iba pa agud nga masiguro nga ro mga eskwelahan hay haum sa tiempo it pagbukas it klase.
Dikara hay magapatigayon it paglimpyo , pag-repair it mga samad nga gamit ag maintenance work sa mga classrooms.
Ginpahayag ni escullar nga ro Regional Brigada Eskwela hay nag-umpisa ko Agosto 7 sa Iloilo National High School.
