KALIBO, Aklan—Nasorpresa ro mga atleta, trainer ag coaches sa ginpatigayon nga pagpasidungog ag pagtau it cash incentives it provincial government it Aklan sa humakot it medalya sa bag-o eamang natapos nga Palarong Pambansa 2023 nga ginpatigayon sa Marikina City.
Antes ro simpleng seremonya sa Aklan training center hay nagpatigayon it motorcade nga naglibot sa pilang banwa sa Aklan.
Suno kay coach Jovie Ote it athletics nga inspirado ro mga student athletes it Aklan bangud nga bukon eamang ro mga gold medalists ag record breaker sa Palarong Pambansa ro nataw-an it insentibo kundi maskin ro iba pang mga participants it pahampang.
Para sa individual incentives, ro Gold – P15,000; Silver – P12,000; Bronze – P10,000; sa team play incentives: Gold – P10,000; Silver – P9,000; Bronze – P8,000.
Sa pihak nga parte, sa trainers, Gold – P8,000; Silver – P6,000; Bronze – P5,000 ag ro record breaker nga naga-isaeahanon sa aklan sa patag it swimming hay nagbaton it P20,000.
Dugang pa ni coach Ote nga owa it nag-uli nga euhaan bangud nga ro mga owa nag-uli it medalya hay nagbaton it tig-5,000 pesos.
Samtang, bangud nga off-season makaron it mga student athletes hay gintaw-an sanda it kahigayunan nga makapahuway ag sa uman nga pagbukas it klase hay uman nga igabalik ro andang training.
