KALIBO, Aklan—Gintaw-an it punto it Aklan Provincial Health Office ro importansya it pagpasuso it mga ina sa andang eapsag.
Raya hay kasunod it selebrasyon it breast feeding month makaron nga Agosto nga may temang “𝙄𝙨𝙪𝙡𝙤𝙣𝙜 𝙖𝙣𝙜 𝙡𝙞𝙜𝙩𝙖𝙨 𝙖𝙩 𝙢𝙖𝙡𝙪𝙨𝙤𝙜 𝙣𝙖 𝙥𝙖𝙜𝙥𝙖𝙥𝙖𝙨𝙪𝙨𝙤 𝙥𝙖𝙧𝙖 𝙨𝙖 𝙢𝙖𝙣𝙜𝙖𝙜𝙖𝙬𝙖𝙣𝙜 𝙋𝙞𝙡𝙞𝙥𝙞𝙣𝙖”.
Angot kara, ginpahayag ni Patricia Rojas, Nurse 1 it PHO Aklan nga may mga nakalinyada sanda nga aktibidad agud nga taw-an it igtaeopangod ro nasambit nga selebrasyon.
Sambilog eon sigon kara ro breastfeeding photo contest kon sa siin pwede nga iflex it mga mommies ro andang unique nga pagpasuso sa andang mga eapsag.
Raya hay may kaakibat nga pa-premyo.
Samtang sa pihak nga parte, ginpaathag mat-a ni Yjhyl Dela Cruz, Nurse 1 it PHO Aklan nga ro breastfeeding ukon pagpapasuso it gatas hay ro pinakaimportanteng pamaagi para sa pagpakaon a mga eapsag.
Importante sigon raya para sa ikaayong eawas it eapsag bangud nga maabong nutrisyon nga mabuoe sa gatas it ina kon sa siin ginaangkon kara ro maabong bitamina, protina ag fats nga kinahang-ean it onga sa pag-onga.
Ro pagpasuso sa mga eapsag sa unang an-om nga buean hay makabulig it mabahoe bukon eamang sa ikaayong eawas it onga kundi pati eon man sa ikaayong eawas it ina.
