KALIBO, Aklan—Mabahoe ro pagpasaeamat it barangay council it Jumarap, Banga sa Department of Public Works and Highway ukon DPWH ag Bombo Radyo Kalibo matapos nga natigayon eon nga ma-rehabilitate ro pilang portion it natiphag nga revetment wall sa nasambit nga lugar.
Sakop it rehabilitation works ro nasamad nga portion it revetment wall sa Barangay Jumarap hasta sa Barangay Palale nga mabuhay eon nga ginareklamo it mga residente bangud sa pagkabaeaka nga maapektuhan ro andang mga propiyedad eabi eon kon nakaexperiensiya it mabaskog nga uean ag masueog nga tubi-baha.
Bangud nga kapin sa P20 milyon pesos eon lang ro nabilin nga pondo it ahensiya para sa nasambit nga proyekto makaron nga 2023, inabot eamang it 64 meters ro natigayon nga maayos.
Nasayuran nga ro nasambit nga proyekto hay may haba nga 800 meters nga kinahangean nga maayos.
Suno kay Jumarap barangay kagawad Rolando Reyes nga naka-experiensiya sanda dati nga kada magtaas ro tubi-baha sa Aklan river hay madasig ro pagkabkab it eugta kun sa siin haeos una eon sa andang banawang ro tubi.
Nagaeaum sanda nga uman nga mapondohan ag mapaeawig pa ro proyekto sa masunod nga dag-on.
