KALIBO, Aklan—Kadungan sa pag-arangkada it 10-day campaign period para sa nagahilapit nga Barangay ag Sangguniang Kabataan Elections sa Oktubre 30, ginpadumdum ni sangguniang panlalawigan member Nemesio Neron ro mga kandidato kaibahan ro andang mga tagasuporta nga magsunod sa ginapatuman nga sueundanan.
Raya suno kana ro tiempo nga maipakilaea it mga kandidato ro andang mga kaugalingon kamana man ro andang plata porma de gobyerno.
Bangud nga ro Barangay ag Sangguniang Kabataan Election hay makabig nga non-partisan, likawan nga maeakot sa anuman nga gulo.
Dapat suno kana nga ro mga nagapa-ilihir sa raya nga eleksyon hay haum nga magtau it boluntaryo ag sinsero nga serbisyo sa mga pumueuyu ag bukon it personal nga interes ro tuyo.
Ukon mas unahon gid ro interes it kaabuan.
Ro barangay sigon ro nagapanguna sa pagtau it serbisyo publiko rason nga dapat nga magpili ro mga botante it mga mayad nga lider nga magasuporta sa kampanya kontra korapsyon, illegal nga droga, ag kriminalidad.
