Sangka Akeanon nga ginapatihan nga may deperensiya sa paminsaron ro nakit-an sa may gateway paagto sa Malumpati sa probinsiya it Antique, adlaw it Lunes, Nobyembre 27.
Suno kay Alyas Jhe-jhe nga nakita raya it anang asawa ag ama ag sa andang pagpangutana hay nagpakilaea ro babaye nga si Alma Bonifacio ag residente it Brgy. Pagsanghan, Banga.
Nagpangayo sigon it pagkaon ro babaye kanda.
Nahimo pa sigon nga mag-joke it babaye nga imaw si Alma Moreno, apang ko ulihi hay anang ginbawi ag nagpakilaeang si Alma Bonifacio.
Nagsakay sigon imaw sa Patrol Car it Aklan ag ginpapanaog sa Kandari, Pandan, Antique.
Hasta makaron hay nagalibot-libot eamang ro gina-ubra ni Bonifacio.
Bangud kara, nagpanawagan si Jhe-jhe sa mga pamilya it babayi nga bue-on imaw sa Antique bangud nga makaeu-eu-oy ro anang sitwasyon idtu.
Pagpati ni Jhe-jhe nga nakakaexperiensiya it depression ro babayi.
