KALIBO, Aklan—Ginsueang eon it anang pamilya sa Pandan Municipal Police Station ro sangka babaye nga may diperensiya sa paminsaron nga tumandok it Barangay Pagsanhan, Banga.
Suno kay P/Senior Master Sgt. Riza Jamelarin nga bandang ala-1:03 it hapon it Miyerkules hay nag abot ro pamilya ni Alma Bonifacio agud nga i-uli sa Aklan nga una sa mayad nga kahimtangan.
Nasayuran nga ginsapopo it nasambit nga police station ro babaye matapos nga makita it mga residente nga nagapalaboy-laboy sa karsada ag nagapinangayo it pagkaon.
Matapos nga mabo-oe ro mga nagakaigo nga impormasyon, nakipag angot ro Pandan PNP sa Banga Municipal Police Station ag sa Municipal Social Welfare and Development office agud nga mausoy ro anang pamily.
Ginasugid nga naka-abot ro babaye sa antique matapos nga magsakay raya it saeakyan ag ginpapanaog sa Candari, Pandan.
Nasayuran nga nakaangkon it depresyon ro ginang matapos nga magbueag sanda it anang asawa kun sa siin naaywan sa anang poder ro andang sambilog nga unga nga makaron hay daeaga eon.
