KALIBO, Aklan—Nabulabog ro manami nga katueogon it mga residente ag overseas Filipino workers ukon OFW’s sa Al Ain City sa United Arab Emirates.
Raya hay kasunod it pag-uean it yelo sa nasambit nga lugar.
Suno kay Bombo International Correspondent Marry Ann Ruiz, tubong banwa it Banga apang kapin sa 15-anyos eon nga nagatrabaho sa nasambit nga nasyon nga raya ro andang unang kahigayunan nga nakaeksperyensya it hail storm.
Ko dag-on 2018 sigon hay nag-uean man it yelo sa Dubai apang bukon it kaparehas sa andang naeksperyensyahan nga matsa maintok nga bato ro nagatugpa sa andang mga bubungan.
Ro insidente hay nagtuga it pagkasuspinde it andang trabaho ag mismong ro transportasyon sa lugar bangud nga ginabawaean ro pagbyahe.
Mag-eowas kara, naeobong sa ice ro mga saeakyan ag nagkaeasamad ro andang mga windshield bangud sa pag-uean it mga yelo.
Sa pihak kara, imbes nga mahadlok ro mga OFW’s sa andang sitwasyon bangud sa naforecast ro UAE nga pagaueanon sa sueod it ap-at nga adlaw, gin-enjoy eon lang it iba ro kahigayunan kon sa siin nakahimo ro mga raya it snowman.
