KALIBO, Aklan—Nag-apela si sangguniang bayan member Ronald Marte it kooperasyon ag pag-intindi sa mga maapektuhan nga negosyante it Kalibo public market nga padayun nga nagareklamo sa gintaeana kanda nga relocation site.
Suno kana nga kinahangean anay nga magsakripisyo it makadali bangud nga ro ginaplano it lokal nga gobyeno hay para man sa andang kamaeayran.
Raya hay kasunod it pag-insister it ibang negosyante nga ilibahon ro dry ag wet section sa sangka relocation site sa igasaradong kahabaon it Toting Reyes St. nga maga-umpisa sa kanto it Roxas Avenue Extension hasta sa kanto man it 19 Martyrs St. Kalibo.
Paga-obrahon man nga halfway ro Roxas Avenue Extension hasta sa sangka mabahoe nga mall agud nga makaangkon it service road ro mga heavy equipment.
Sa makaron hay madali eon lang nga matapos ro pagasayluhan it mga negosyante sa san lorenzo drive sa terminal it eastern side.
Suno kay Marte nga plano kara nga ibutang ro meat, fish ag vegertable vendors samtang sa toting reyes st ro mga negosyante it dry section.
Nauna eon nga ginpahayag it Municipal Economic Enterprise and Development Office ukon MEEDO-Kalibo nga umpisa sa unang domingo it Abril hay iga-relocate eon ro mga negosyante sa nasambit nga lugar agud nga maumpisahan ro construction it bag-ong tindahan.
Base sa plano, paga-okupahan it mga negosyante ro terminal area ag ro mga saeakyan hay igasaylo sa sangka bakanteng lote sa kilid it sangka mall sa F. Quimpo St. Extension nga makaron hay gina-istoryahan it pamunuan it mall ag ko LGU-kalibo.
Indi suno kana maumpisahan ro construction hasta nga indi ma-transfer ro mga negosyente.
Ginaboeobanta nga magabuhay it sang dag-on antes nga matapos ro pag-obra it bag-ong public market nga makatau suno kana it kasoehayan sa parehong bumaeakae ag mga negosyante kun sa siin makaangkon eon it maeapad nga parking space kamana man nga plastado ro mga stalls para sa wet ag dry section.
