Padayon ro pagpahaom it Starlight Shipping Company para sa planong pag-umpisa it operasyon sa Dumaguit Port sa New Washington, samtang ginahueat ro pag-apruba sa mga kinahangean nanda nga permit.
Suno kay Nieven Maquirang, executive assistant to the governor ag incharge to the cruise ship and special project, nagsumite eon ro kumpanya it aplikasyon para sa business permit sa lokal nga gobyerno it New Washington.
Naghimo man raya sa Philippine Ports Authority (PPA) it berthing allocation nga may sueod nga kasiguraduhan it petsa ag oras it pagbyahe it barko.
Ro nasambit nga sertipikasyon halin sa PPA hay kinahangean antes ma-proseso it Maritime Industry Authority (MARINA) ro special ukon provisional permit para sa biyahe.
Target nga maumpisahan ro operasyon antes ro Undas, depende sa pagkumpleto it mga dokumento ag pag-apruba it mga permit.
Bago ro unang biyahe, ginaeauman man nga makikipagpueong ro kumpanya sa mga representante it trucking companies, bus operators ag iba pang stakeholder agud mapahauman ro daloy it mga saeakyan ag pasahero.
Ginaeauman man nga mapadali it pagbukas it ruta ro transportasyon it mga produkto ag saeakyan halin sa Aklan paadto it Batangas ag iba pang lugar.
Posible man rayang magbukas it oportunidad para sa turismo, negosyo ag pagpangapital sa probinsya.
