KALIBO, Aklan—Sangka resolusyon ro gindihon sa sangguniang bayan it Kalibo nga nagahinyu nga mas pang hugtan ro police visibility ag foot patrolling sa mga nagapangunang karsadahon sa Barangay Poblacion, Kalibo.
Suno kay SB member Raymar Rebaldo nga sa gindihon nga resolution, gina-engganyo kara ro pamunuan it Kalibo Municipal Police Station nga mas pa nga pabaskugon ro pagpatrolya it kapulisan agud nga maprotektahan ro mga pumueuyu kontra sa mga kriminalidad.
Nataeupangdan suno kana nga matapos nga ginsaylo ro taeatapan it Kalibo PNP sa bag-ong lokasyon sa Jaime Cardinal Sin Avenue hay maeaka eon makakita it mga pulis eabi eon sa mga pampublikong lugar.
Mabahoe nga bulig man suno kana ro pag angkon it police visibility sa mga bisita ag turista it banwa nga may mapangutan-aw angot sa mga importanteng impormasyon nga gusto nanda nga masayuran partikular ro mga lugar nga gusto nanda nga agtunan.
Dugang pa nga tuyo man kara nga hugut nga mapatuman ro curfew hour sa mga menor de edad.
Nagapati imaw nga mabahoe eon man ro numero it populasyon it kapulisan sa kalibo rason nga bukon it mabudlay nga mapatuman ro andang ginahinyu.
Ro nasambit nga approved resolution hay nakataeana nga igapadaea sa pamunuan it Aklan Police Provincial Office.
