KALIBO, Aklan—Pagadaehon eon lang it pamilya Rodriguez sa korte ro andang land dispute kontra sa pamilya Idao sa Brgy. Cabugao, Batan.
Raya hay bangud nga sa pihak it ginpatigayon nga joint survey it gin-hire nga mga pribadong surveyor it magtimbang nga parte ko Marso 20 hay owa nagpabor sa resulta ro pamilya Idao.
Suno kay punong barangay Rizal Ric-Ric Rodriguez it nasambit nga lugar nga igapaagi eon lang nanda sa proseso ro isyu agud nga malikawan ro mas pa nga pag-init it tensyon.
Natukiban sa ginpatigayon nga survey nga ro gina-claim nga portion it property it pamilya Idao hay ginapanag-iyahan it pamilya Rodriguez.
Apang nagpamalibad sigon nga magpirma sa compromise agreement ro pihak nga pamilya maskin nga raya hay ginpatung-an eon it Department of Environment and Natural Resources ukon DENR.
Nasayuran nga ro gina-agawan nga dueunan it eugta hay nakasueod sa parsela it eugta nga gindonate it pamilya Rodriguez sa eskwelahan nga pilit nga gina-aku it mga Idao.
Dugang pa ni kapitan Rodriguez nga nag inhibit imaw sa pagresolba it isyu agud nga indi maakusahan it pagiging bias.
Sa pihak nga parte, nagpamalibad anay nga magtau it komento si kapitan Rodriguez sa maugong nga balita nga magapailihir imaw bilang alkalde it batan sa 2025 midterm elections.
Owa pa sigon raya natalakay ag nadesisyunan it andang pamilya.
Mag-eowas kara, nakadepende sigon raya sa desisyon it andang partido ag pulso it publiko.
Samtang, nagpahaging man imaw sa pilang mga opisyal it banwa nga indi sigon magpaguwa it saea nga impormasyon nga makapataeang sa publiko ag makatuga it owa pagka ilintindihan .
