KALIBO, Aklan—Ginpaabot ni sangguniang panlalawigan member Nemesio Neron sa mga pumueuyu nga magtaeana it oras makaron nga tiempo it kuaresma agud nga dumdumon ro eubus nga sakripisyo ni Hesukristo para sa atong kaeowasan kamana man nga magpamaeandong, magpangamuyo ag magpangayo it kapatawaran sa kasae-anan nga atong nahimo.
Dapat sigon nga isipon ro natabu sa kabuhi Kristo nga unga it Diyos nga nagpasugot nga isakripisyo ro anang kabuhi agud nga maeowas ro sangkatawuhan.
Dugang pa kara nga isipon naton nga anumang kabudlay ag pagpangasubo sa atong kabuhi makaron hay mapahagan-hagan kon kita hay magatinguha ag magasakripisyo kapareho it gin-obra ni HesuKristo.
Obrahon suno kana nga halimbawa ro sakripisyo sa Krus it atong mang-eoeowas nga nagtau it pageaum ag sabat sa atong kabuhi.
Engganyo man ni Neron ro tanan nga magsunod sa sugo it Diyos agud nga indi magtaeang it daean nga paga-agihan paagto sa bag-ong kabuhi.
Sa pihak nga parte, ginpadumdum man nana sa tanan nga magdahan kon nagabiyahe ag indi masyadong magbuead sa init it adlaw kon naga-agto sa mga pilgrimage sites eabi eon ro mga senior citizens.
