KALIBO, Aklan—Ginklaru it Department of Public Works and Highways ukon DPWH-Aklan nga natigayon eon nga ma-repair ro ginareklamo nga karsadahon nga may mga mabahoe nga buho sa boundary it Libas ag Tabayon sa banwa it Banga nga takaw-aksidente sa mga motorista.
Suno kay Engr. Joey Ureta, maintenance section it DPWH-Aklan nga natapos nanda ro operasyon sa nasambit nga lugar ko nagtaliwan nga Marso 13 pa it makaron nga dag-on.
Nauna eon nga ginpaabot it sangka residente ro reklamo sa Bombo Radyo kaibahan ro mga litrato kun sa siin makita ro daywang mga mabahoe nga buho sa tunga it karsada.
Samtang, ginpahayag pa ni Engr. Ureta nga nagapadayun ro andang road rehabilitation project sa eastern side it Aklan kaibahan ro pag-aspalto partikular sa Brgy. Aranas, Balete.
Problema man sigon nanda ro kakueangan it pondo bangud nga imbes 100% hay 25% eamang ro nag-abot rason nga kon amat hay gina-utang anay nanda ro sweldo it andang mga trabahador hasta nga nag abot sa punto nga nagbawas pa it manpower.
Sa pihak nga parte, nag apela si Engr. Ureta nga direktang makipag angot kanda kon may mga problema ag indi eon ipaagi sa social media.
