KALIBO, Aklan—Ginkumpirma ni Fr. Tudd Belandres, Parish moderator it St. John the Baptist Cathedral nga magabisita man ro milagrosong Itom nga Nazareno it Quiapo sa banwa it Kalibo sa Abril 23 kun sa siin magapabilin raya sa simbahan hasta sa Abril 24.
Suno kay Fr. Tudd nga ginpahauman nanda raya bangud sa ginaeauman nga pagdagsa it ginatos nga nga deboto eabi pa ag raya ro unang kahigayunan it pagbisita sa nasambit nga simbahan.
Magapatigayon sigon it prusisyon sa pag-abot it pilgrim image it Black Nazarene sa mga nagapangunang daeanon sa Kalibo ag bandang alas-6 it gabi-i hay makaangkon it misa nga pagasundan it vigil hasta alas-11 it gabi-i.
Kadungan kara, nag abiso ro simbahan nga doblehon ro pagdahan sa pagtambong sa event ag pirmeng magbaeon it tubi bangud sa mainit nga paniempo.
Nasayuran nga nag-abot sa Our Lady of The Most Holy Rosary sa Barangay Rosario, Malinao ro replica it imahe it Black Nazarene it Quiapo, kun sa siin raya eon ro ikaywang beses nga pagbisita.
Sa abril 24 hay igatabok ro imahe sa simbahan sa isla it Boracay antes nga igabalik sa Quiapo Church.
