KALIBO, Aklan—Owa pa it ensaktong petsa kon hin-uno iga-relocate ro mga vendors it Kalibo public market agud nga maumpisahan eon ro construction it bag-ong tindahan.
Raya ro ginpahayag ni Municipal Economic Enterprise Development Office ukon MEEDO-Kalibo Head Mary Gay Quimpo-Joel.
Suno kana nga ginmanduan eon nana ro pamunuan it Transport and Traffic Management Division nga makipag-angot kay Municipal Engineer Amy Francisco agud nga masayuran kon hin-uno eon pwedeng makasaylo ro mga Public Utility Vehicle drivers sa gintaeana kanda nga temporaryong eastern side terminal area sa parte it F. Quimpo St. sa sangka bakanteng lote sa kilid it sangka mall nga may eapad nga 2,168-square meters.
Haeos patapos eon man sigon ro construction it nasambit nga terminal area kun sa siin sangkiri eon lang ro kinahangean nga ayuson.
Dugang pa ni Joel nga paga-umpisahan ro proyekto nga nagatuyo nga ma-modernize ro public market sa oras nga makasaylo eon ro mga vendors sa pagabakantehon nga Eastern Side Terminal sa San Lorenzo Drive sa Barangay Andagao, Kalibo.
Ro lugar hay pagabutangan it mga temporaryo nga stalls para sa mga vendors it dry goods.
Haum eon suno kana ro pagasayluhan it mga vendors it fish, chicken ag meat sections sa gin-rentahan nga eugta sa pamilya Garcia sa kilid it terminal.
Nauna eon nga gin-insister it mga negosyante nga miyembro it Kalibo Public Market United Stall Owners and Vendors Association sa lokal nga gobyerno nga ibutang sanda sa kilid it tindahan sa Toting Reyes St. nga temporaryong igapasarado sa mga motorista, apang owa raya ginpasugtan.
Ginaboeobanta nga ro proyektong pag-modernize sa tindahan hay nagabalor it 300 milyon pesos ag ginaeauman nga matapos sa sueod it sang dag-on.
Tuyo kara nga makatau it kasoehayan sa parehong mga bumaeakae ag mga negosyante.
