KALIBO, Aklan—Nag-apela ro Department of Agriculture region VI sa mga mangunguma nga batunon ro mga pagbag-o sa pagpananom agud nga inde maeansang sa traditional nga pagpanguma.
Raya ro naging mensahe ni Regional Executive Director Dennis Arpia sa ginpatigayon nga inagurasyon it Rice Processing System sa Aklan Grains Processing Center sa Brgy. Nalook, Kalibo.
Si Arpia hay sambilog sa mga dinapit nga bisita sa pagbukas it sangka high-tech nga galingan nga ginpaambit it Department of Agriculture pinaagi sa PHilMech.
Suno pa kay Arpia, kaakibat it moderno nga pasilidad ag mga machineries hay ro hangkat sa mga mangunguma nga mapataas ro andang ani.
Mahimo eamang sigon raya kon mag-adopt ro mga mangunguma sa moderno nga pagpananom halin sa traditional nga nakaangdan.
Sa makaron nga panyempo suno kana hay makabulig sa mga raya ro paggamit it mga de-kalidad nga abono ag pestisidyo agud nga mapataas ro andang ani.
Bangud kara, ginpromisa ni Arpia nga nagapabilin ro andang commitment sa pagbulig ag pagtao it suporta para alalayan ro mga mangunguma sa mga pagbag-o it pagpanguma.
Nasayuran nga ro Rice Processing System hay nagabalor it P50 million pesos nga pagadumaeahan it gobyerno probinsyal.
