KALIBO, Aklan—Pagaeauman nga magiging star studded ro opening ceremony it Western Visayas Regional Athletic Association ukon WVRAA Meet 2025 nga igapatigayon sa Binirayan Sports Complex sa probinsya it Antique kon sa siin sanda ro host province para makaron nga dag-on it regional sporting events.
Raya ro ginpahayag it Department of Education ukon DepEd officials it Antique sa ginpatigayon nga press conference kon sa siin ginhathat man ro pila ka program flow para hinduna it hapon ag ro mga ginaekspektar sa sueod it sang dominggo nga sporting events.
Suno pa kay Antique Schools Division Superitendent Dr. Nicasio Frio, bandang alas-4:00 it hapon igapatigayon ro parade of athletes and coaches ag pagasundan it mapig-od nga programa.
Imbitado sa aktibidad ro mga gobernador it mga natungdan nga probinsya ag pila ka mga opisyal maghalin sa DepEd national.
Nasayuran nga nagaabot sa masobra 5,394 ro kabilugan nga delegasyon nga ginakaeakipan it mga atleta, coaches, chaperoons, technical officials ag iba pa makaron nga WVRAA Meet 2025 sa probinsya it Antique.
