BORACAY, Island — Ginkalipay it lokal nga gobyerno it Malay ro padayon nga paghanga it mga biyahero halin sa nagkaeain-eain nga parte it kalibutan sa isla it Boracay matapos nga makuhit kara ro rangko bilang 3rd Best Island in Asia sa DestinAsian Reader’s Choice Awards 2025.
Ro magkasunod nga pagkilaea nga nabaton it Boracay kon sa siin ko kan-o eamang hay sueod man raya sa listahan it Best Beaches Around the World it international travel magazine hay pamatuod nga nagahari gihapon ro isla sa international travelers kapin eon sa mga dumueoong turista rason nga sa listahan gihapon nanda nga maadtunan raya agud nga maexperience ro maeamig, puti ag pinong baeas kamana man ro mala-kristal nga tubi-dagat.
Samtang, mainit nga ginbaton it LGU Malay ro pagbisita it MV Seabourn Quest sakay ro kapin sa 793 nga pasahero nga ginakaeakipan it mga dumueoong turista ag mga crew members kon sa siin raya eon ro ika-11 nga cruise ship nga nag-abot makaron nga dag-on ag ro una para sa buean it Marso.
Nauna eon nga ginpahayag ni Kathrine Licerio, tagapaghambae it Malay Tourism Office, eauman pa sigon ro an-om pang cruise ship nga magabisita sa Boracay hasta sa matapos ro presenteng dag-on.
Sa makaron suno kana hay puspusan ro pagpahaom it mga accommodation establishments sa ginaeauman nga influx it tourist arrival sa nagahilapit nga holy week kon sa siin ginaeauman ro mahaba-habang bakasyon.
Ginpadumdom man ni Licerio ro mga bisita ag bakasyunista nga sa accredited accommodation establishments eamang magpa-book bago pa man ro bakasyon agud nga inde maaberya ro masadya kunta nga experience sa Boracay.
