NATIONAL News — Gin-aresto it mga operatiba it Bureau of Immigration (BI) ro sangka Russian vlogger nga nag-viral sa social media bangud sa pagpang-insulto ag pagpamigos kara sa mga Pilipino sa Bonifacio Global City (BGC) sa Taguig City.
Suno kay BI intelligence division chief Fortunato Manahan, Jr. ro pag-aresto kay Vitaly Zdorovetskiy, 33, hay matapos matumod nga imaw hay sangka undesirable alien kasunod it anang mga viral nga post sa social media.
Nasayuran nga ro pag-aresto sa nasambit nga dumueuong hay kaparte it padayun nga pagtinguha it gobyerno nga masiguro ro kaeowasan it publiko ag mapabilin ro kaayusan, sandig sa promisa ni Pangueong Ferdinand ‘Bongbong’ Marcos, Jr. nga sakdagun ro mga kinamatarung ag dignidad it mga Pilipino.
Ginpamilit ni Immigration Commissioner Joel Anthony Viado nga maskin nga kilaea ro mga Pilipino sa andang mayad nga pag-estima ag pagtrato, ro mga dumueuong nga bisita hay ginaeauman nga igarespeto ro mga lokal nga pagbinatasan ag sundon ro mga laye it Pilipinas.
Nauna kara, naakig ro mga netizens kay Vitaly matapos raya nga mag-post it mga video it anang kaugalingon nga nagapang-harass it mga Filipino samtang nagabo-oe it video sa palibot it BGC.
Ginpatigayon ro pag-aresto sa koordinasyon it PNP Makati ag Criminal Investigation and Detection Group (CIDG).
Ginsaylo eon si Vitaly sa detention facility it BI sa sueod it Camp Bagong Diwa sa Bicutan, Taguig, samtang ginahueat ro deportation proceedings kara.
