KALIBO, Aklan—Nagpaabot it kasubo ag simpatiya sa pamilya Dayang si Aklan second district congressman Teodorico Haresco kasunod it pagbaril-patay sa anang ginakabig nga amigo nga si Juan “Johnny” Dayang.
Ro 89-anyos nga beteranong journalist hay dead on arrival sa Aklan provincial hospital matapos nga ginbaril-patay samtang nagapungko sa anang rocking chair ag nagapamantaw it TV sa andang panimaeay bandang alas-8:00 it gabie it Martes, Abril 29, 2025.
Suno sa kongresista, inde imaw makapati sa natabo nga insidente bangud nga si Dayang hay bukon eamang it kilaeang tawo sa Aklan kundi sa patag it media sa bilog nga nasyon.
Ginpahayag dugang nga bilang Chairman Emeritus it Publishers Association of the Philippines ag National Press Club, gin-aywan nana ro inde matupungan nga mga kontribusyon bilang sangka mayad nga kolumnista, tagapagbalita, brilliant propagandist, ag tampad nga volunteer it Red Cross.
Samtang, hugot man nga ginkondina it kongresista ro pagpatay kay Dayang sa mismong banwa kara it Kalibo.
