KALIBO, Aklan — Ginpasakaan eon it kasong vote buying ro sangka 56-anyos nga eaeaki nga naboe-an it kwarta ag mga sample ballots sa sangka checkpoint ko bisperas it eleksyon, Mayo 11, sa Brgy. Poblacion, Madalag.
Raya ro ginkumpirma ni P/MSgt. Jane Vega, tagapaghambae it Aklan Police Provincial Office (APPO).
Apang nagpamalibad eon imaw nga magtau it dugang nga detalye ag sa baylo hay gintugyan nana kay Police Captain Jayson Mausig, hepe it Madalag Municipal Police Station ro pagtau it dugang nga impormasyon.
Ginpasakaan imaw it kasong pageabag sa Section 26 it Comelec Resolution No. 11104.
Madumduman nga ro akusado nga nakilaea kay alyas “Romeo”, residente it Barangay Logohon, Madalag hay nabaeabagan sa bandang alas 9:15 it gabi-i samtang sakay it anang motorsiklo.
Bangud sa makadueuda kara nga hueag sa pag-agi sa checkpoint hay gin-usisa imaw it mga awtoridad.
Nabo-oe sa anang posisyon ro stripe nga plastic nga may sueod nga nagkaeain-eain nga sobre nga may sueod nga kwarta nga kapin sa P21,900 nga may nagkaeain-eain nga denominations, sample ballots, campaign materials, ag listahan it coordinators ag leaders.
