POLICE Report — Nakaangkon it mga lastro sa nagkaeain-eain nga parte it eawas ro daywang ka eaeaking biktima nga parehong residente it Brgy. Polocate Banga matapos nga mabun-an kahapon, adlaw it Byernes sa Brgy. San Isidro, Banga bandang alas- 12:30-1:00 it aga-aga.
Suno kay PLt. George Flores, deputy chief of police it Banga Municipal Police Station, base sa andang imbestigasyon, nakaangkon it komusyon ro mga imbolbado sa sueod mismo it baylihan sa nasambit nga brgy.
Nauna sigon nga gin-bayo it suspect ro 17-anyos nga biktima rason it anang pagkatumba, apang kat makit-an it 19-anyos nga kaibahan it biktima ro hitabo, ginbaeusan nana raya ag gin-bayo sa ueo rason man it pag-bugnot it suspect it kutsilyo maghalin sa anang hawak ag insigida sandang ginpangbuno.
Nakaangkon it lastro ro 17-anyos nga biktima sa anang kilid it tiyan samtang ro 19-anyos nanang kaibahan hay naigu-an sa anang tiyan ag butkon. Insigidang gindaea ro daywang biktima sa Provincial ospital apang nakapaeagyo ro suspetsyado pagkatapos it hitabo.
Presenteng naka-admit makaron ro 17-anyos, apang ro anang kaibahan hay una sa makaron sa ICU bangud sa naangkon nga lastro sa tiyan.
Samtang, bangud sa insigidang pag-conduct it mga kapulisan it manhunt operation sa brgy. Feliciano Balete kun sa siin naka-istar ro suspect, nadakpan raya bandang alas-4:30 it hapon kahapon sa nasambit nga lugar.
Pagapasakaan ro nasambit nga suspect it kasong Frustrated Homicide.
