Ginbatikos ni dating Senador Leila de Lima si Vice President Sara Duterte matapos hambaeon nga gusto nana it sangka “bloodbath” sa nagahilapit nga impeachment trial sa Senado.
Ginpahayag ni Duterte nga maskin uwa sanda naila nga umabot sa pagbista ro proseso, ginapahaom eon it anang legal team ro magiging depensa.
Bilang miyembro it panel it mga prosecutor sa impeachment ag ginaeauman nga representante ro Mamamayang Liberal (ML) party-list sa ika-20th Congress, eagi nga nagsabat si De Lima sa social media kon sa siin inde pwedeng makaangkon it “bloodbath” bangud nga ro nakasuhan eamang ro magapaidaeom sa pagbista.
Dugang pa nana, ro impeachment trial hay sangka seryosong proseso it saeabton sa idaeom it Konstitusyon ag bukon raya it entablado para sa kinagamo ukon ka-dramahan.
Ginpaandaman man nana ro kampo ni Duterte nga pwedeng magapangatubang sa contempt kon tinguhaon nga guluhon ro proceedings.
Ginhangkat ni De Lima si Duterte nga atubadngon ro pagbista nga may pagrespeto sa proseso ag ginpasiguro nga pagarespetuhon ro anang kinamatarong sa idaeom it laye.
