KALIBO, Aklan — Haum eon ag excited ro mga atlhletics players halin sa probinsiya it Aklan nga kaibahan sa pambato it Western Visayas sa nakataeana nga Palarong Pambansa 2025 sa Laoag, Ilocos Norte.
Suno kay athletics coach Jovie Ote nga ro mga players halin sa Aklan nga na-qualify hay ginaeakipan it an-um nga eaki sa seconday ag tatlo sa elementary kamana man nga tatlong babaye sa secondary.
Pila sa mga raya hay repeater ukon nakasabak eon dati sa Palarong Pambansa samtang ro iba hay mga bagito.
Samtang, ginpahayag ni Ote nga indi eamang makabalik sa dating ikaywang pwesto ro andang target kundi nga mabo-oe ro kampeonato nga mabuhay eon nga gina-gahuman it powerhouse nga NCR.
Matapos sigon ro naging kompetisyon sa WVRAA hay owa eon nagpundo ro andang training sa mga atleta.
Sa pihak nga parte, ginpakigbahin man ni Ote nga imbes nga magabiyahe by-land nga masyadong maga-oy hay gin-usuyan sigon it pamaagi it provincial government it Aklan nga ro tanan nga mga atleta nga na-qualify sa Palarong Pambansa kaibahan ro andang mga coaches hay magabiyahe by-air ukon magasakay sanda tanan sa eroplano.
Nasayuran nga masobra sa 50 ro atleta it Aklan nga magasabak sa nasambit nga sporting event.
May tatlong Aklanon athlete sigon nga na-qualify makaron sa bag-ong gin-introduce nga hampang nga weightlifting.
