Ginpanindugan ni Malay Sangguniang Bayan Member Alan Palma Sr. bilang hairman of committee on public works and utilities nga inde imaw magpasugot sa ginaplanong pagpatindog it tulay maghalin sa mainland Malay patabok sa isla it Boracay kon inde pag-ihathat ro mga kinahang-ean nga masayuran para sa mga asosasyon, korporasyon, negosyo ag indibidwal nga nakataeanang maapektuhan it nasambit nga proyekto.
Halin suno kana kat naging miyembro imaw it Sangguniang Bayan hay uwa sanda it nabaton nga proposisyon ag social media eamang nanda raya nasayuran.
Gin-insister it opisyal nga maskin anu nga proyekto hay kinahang-ean nga mag-agi it konsultasyon sa lokal nga gobyerno ag sa mga pumueoyo.
Samtang sa pihak nga parte, nagpanawagan imaw kay Department of Public Works and Highways (DPWH) Secretary Manuel Bonoan it transparency angot sa nasambit nga proyekto. Kon kinahang-ean nga magpatawag it press conference agud nga maihathat ro tanan nga kinahang-ean nga masayuran it komunidad hay dapat nga himuon.
Uwa suno kana imaw it idea kon may endorsement gidman ro nasambit nga Boracay bridge.
Nasayuran nga sa buean eon it Hulyo igaanunsyo it DPWH ro desisyon sa kontrobersyal nga P7.95-bilyong proposed 2.54-kilometers Boracay bridge nga pagapondohan it San Miguel Corporation (SMC). Apang, bago pa man raya isapinal hay kinahang-ean anay nga mabuoe ro suporta it mga lokal nga gobyerno bago buksan sa Swiss challenge process.
