BALITANG ESPESYAL — Ginbawaean it mga regulator sa China ro sangka bangko sa nasambit nga nasyon nga mag-tanyag it libreng Labubu dolls sa mga bag-ong kustomer.
Ro mga Labubu dolls, sangka sikat nga hampangan hay naging importanteng koleksiyon matapos raya nga i-feature it mga sikat nga personalidad kapareho nanday Rihanna ag Dua Lipa.
Ginasugid nga ro pagtau it bangko it nasambit nga hampangan hay bilang pang-engganyo it bag-ong customer.
Nasayuran nga kan-o eamang hay gin-anunsyo it Ping An Bank, nga nakabase sa Shenzhen ro sangka promosyon kun sa siin ro mga bag-ong kustomer nga magadeposito it indi maganaba sa $7,000 ag magapabilin sa andang account it indi maganaba sa tatlong buean hay makabo-oe it Labubu, sangka sikat nga stuffed toy nga ginabaligya it Pop Mart.
Apang ginbawae it National Financial Regulatory Administration it Zhejiang branch ro bangko nga mag-offer it mga libreng hampangan ag iba pang benepisyong owa it kaangtanan sa banking.
Suno sa mga regulator, nagakabaeaka sanda sa nasambit nga promosyon, ag iba pang kaparehong promosyon it ibang mga bangko bangud sa posibilidad nga magtuga it pagtaas sa gastos sa pagbangko.
Ro mga Labubu dolls hay himo it artist nga si Kasing Lung ag ginabaligya sa blind boxes sa mga baealigyaan it Pop Mart.
Ro mga raya hay mga cute nga nagahibayag nga monster doll nga may mataeum nga mga ngipon.
