KALIBO, Aklan — Pormal eon nga ginsumite it Bagong Alyansang Makabayan ukon BAYAN Panay ro proposisyon nga P250 nga dugang sa adlawan nga minimum wage it mga trabahador sa pribadong sektor sa Western Visayas sa ginpatigayon nga public hearing it Department of Labor and Employment (DOLE) ag Regional Tripartite Wages and Productivity Board 6 (RTWPB-6), adlaw it Biyernes, Oktubre 9, 2026.
Suno kay BAYAN Panay Secretary General Elmer Forro, bukon eon it bastante ro presenteng P550 nga adlawan nga minimum wage bangud sa padayun nga pagtaas it presyo it mga nagapangunang baeak-eon, serbisyo ag pamasahe.
Sa idaeum it proposisyon, gusto it grupo nga ipataas sa P800 ro adlawan nga minimum wage agud nga makabulig sa mga trabahador nga makatupong sa nagatinaas nga gaeastuson, kadungan it pagnaba it purchasing power it piso ag pagtaas it inflation, kun sa siin , ro Aklan ro nakalista it may pinakamataas.
Sa pihak nga parte, gindugang pa ni Forro nga padayun gihapon nanda nga ginasueong ro pag-angkon it national minimum wage agud nga makaangkon it sambilog nga basehan sa pagpataas it sweldo it mga trabahador sa bilog nga nasyon.
Suno kana nga dapat nga mapatuman pinaagi sa laye ro dugang nga sweldo ag indi eamang isalig sa mga Regional Tripartite Wages and Productivity Board.
Pinaagi sigon sa national minimum wage nga gintaeana it laye, ginaeauman nga makaangkon it mas maeapad na kahigayunan ro mga trabahador nga maipakigsukoe ro sweldo nga makasabat sa andang matuod nga kinahangean kaibahan ro living wage.
